१० जेठ, काठमाडौं । तत्कालीन एमाले र माओवादी पार्टी एकतामा व्यस्त रहँदा प्रमुख विपक्षी कांग्रेसमा भने आन्तरिक विवाद चुलिएको छ ।
केन्द्रबाट सुरु भएको पदाधिकारी विवाद अब नेविसंघ, महिला संघ लगायतका भ्रातृ संगठनमा सरेको छ ।
नेपाल महिला संघमा पछिल्लो पटक मञ्जु खाँड महामन्त्री मनोनित भएकी छन् । उनी देउवा समूहका नेता एवं संसदीय दलका प्रमुख सचेतक बालकृष्ण खाँडकी पत्नी हुन् ।
यसअघि उपाध्यक्षलगायतको मनोनयनका बेलामा नै असन्तुष्ट सिटौला समूह खाँडको नियुक्तिले आक्रोशित भएको छ ।
महामन्त्री धनकुमारी खतिवडाले भनिन्, ‘अध्यक्षले एउटा गल्ती गर्नुभएको थियो । त्यसलाई सच्याउनुको साटो अर्को गल्ती गर्नुभएको छ । त्यसविरुद्ध हामी लड्छौं ।’
महिला संघमा देउवा र सिटौला समूह मिलेर चुनाव लडेको थियो । अध्यक्ष उमा अधिकारी देउवा समूहका हुन् भने महामन्त्री खतिवडा सिटौला समूहकी हुन् ।
तर, पदाधिकारी मनोनयनमा देउवा समूहले एकलौटी गरेको सिटौला समूहको गुनासो छ ।
अर्को भ्रातृ संगठन नेवि संघमा पनि विवाद छ । त्यहाँ पनि देउवा र सिटौला समूहले मिलेर चुनाव लडेका थिए ।
तर, अध्यक्ष नैनसिंह महरले पछिल्लो पटक आमन्त्रित सदस्य मात्र १०० भन्दा बढी मनोनित गरेका छन् । उनीहरुमा कतिपय त नाम चलेका गुण्डा नाइकेहरु समेत छन् ।
रामचन्द्र पौडेल र सिटौला समूहका नेताहरुले यो नेविसंघलाई विवादमा ल्याउने र वर्तमान कार्यसमिति विघटन गर्ने खेल भएको भन्दै विरोध गरेका छन् ।अनलाइनखबरबाट
