मधु मिडिया प्रा.ली.द्धारा संचालित

सुचना विभाग द. नं. : ६७८-०७४/७५

ठेगाना : कोहलपुर-१0, बाँके

फोन नम्बर : ९८५८०२२६५६ / ९८५६०३९६०२

ईमेल : [email protected]

नेपालगन्जमा काँग्रेसको क्षेत्रीय मिडिया सेन्टर स्थापना
  • मार्गरेखा संवाददाता

  • नेपालगन्जमा सोमबार मिडिया सेन्टर उद्घाटन गर्दै काँग्रेस केन्द्रिय सदस्य सुरेन्द्र पाण्डे ।

    नेपालगन्ज, कात्तिक २७

    नेपाली काँग्रेसले क्षेत्रीय स्तरको मिडिया सेन्टर सोमबारबाट नेपालगन्जमा सञ्चालनमा ल्याएको छ ।

    नेपाली काँग्रेसका केन्द्रिय सदस्य एवम् केन्द्रिय निर्वाचन परिचालन समितिका सह–संयोजक सुरेन्द्र पाण्डेले एक समारोहका बीच उद्घाटन गर्नुभयो । उद्घाटन समारोहलाई सम्बोधन गर्दै लोकतन्त्रमा आएको कालो बादललाई हटाउन नेपाली जनताले फेरी एक पटक लोकतान्त्रिक शक्तिलाई मत दिने बताउनु भयो ।

    नेपालगन्जमा सोमबार मिडिया सेन्टर उद्घाटन गर्दै काँग्रेस केन्द्रिय सदस्य सुरेन्द्र पाण्डे ।

    उहाँले भन्नुभयो, ‘वाम गठबन्धनबाट जुन खालका अभिव्यक्ति आइरहेका छन, त्यसले मुलुकमा फेरी अधिनायकवाद ल्याउन निश्चित छ, अधिनायकवादलाई समाप्त पार्न नेपाली जनताले फेरी एक पटक हामीलाई भोट दिनुहुनेछ ।’ देशलाई अप्ठ्यारो परेको बेला नेपाली जनताले सधै नेपाली काँग्रेसलाई साथ दिएको स्मरण गराउँदै केन्द्रिय सदस्य पाण्डेले अहिले पनि लोकतन्त्र खतरामा परेको अवस्थामा नेपाली जनताले काँग्रेसलाई साथ दिने विश्वास व्यक्त गर्नुभयो । ‘हिजोका दिनमा नेपाली काँग्रेसलाई समाप्त पार्न खोज्ने शक्तिहरु आफै समाप्त भएर गएको ईतिहास छर्लंग छ, कम्युनिष्टहरु पनि आफै सिधिन खोज्दैछन्,’ उहाँले भन्नुभयो ।

    मुलुकमा साम्यवाद ल्याउने स्वयं बाम गठबन्धनले अभिव्यक्ति दिइरहँदा लोकतन्त्र, संघियता, समावेशिता नै नरहने हो कि भन्ने खतरा रहेको पाण्डेले बताउनु भयो । लोकतन्त्र खतरामा पर्ने अवस्था देखिएपछि नेपाली काँग्रेस लगायत लोकतन्त्रवादी शक्तिहरु एक ठाउँमा उभिनु परेको उहाँले प्रष्ट्याउनु भयो । ‘अबको चुनाव प्रजातान्त्रिक परिपाटी रोज्ने कि कम्यूनिष्ट शासन रोज्ने भन्ने परिक्षाको घडी पनि हो,’ उहाँले थप्नु भयो । लोकतन्त्रलाई अझ बलियो बनाएर समृद्धिको अभियानमा हातेमालो गरेर अगाडी बढ्ने नेपाली काँग्रेसको सोच रहेको पाण्डेले बताउनु भयो ।
    सो अवसरमा बोल्दै नेपाली काँग्रेस बाँकेका सभापति किरण कोईरालाले लोकतन्त्र रक्षाको लागी आसन्न प्रतिनिधी र प्रदेश सभा निर्वाचनमा लोकतान्त्रिक गठबन्धनलाई जिताउन सम्पूर्ण नेपालीलाई आग्रह गर्नुभयो ।

    मिडिया सेन्टर उद्घाटन कार्यक्रममा राप्रपाका केन्द्रिय सदस्य ऋषिराज देवकोटा, नेपाली काँग्रेस केन्द्रिय प्रचार–प्रसार समितिका सदस्य एवम् नेपाल प्रेस युनियनका पुर्वअध्यक्ष समिरजंग शाह, नेपाली काँग्रेस बाँकेका उपसभापति सुनिलनरसिंह राणा, प्रतिनिधी सभा क्षेत्र नम्बर २ का उम्मेदवार ओमप्रकाश आजाद, प्रदेश सभा–२ क का उम्मेदवार निरन्जनसिंह सिजापति, प्रदेश सभा–२ ख का उम्मेदवार सुरेन्द्र हमाल, नेपालगन्ज उपमहानगरपालिकाका उपमेयर उमा थापामगर लगायत लोकतान्त्रिक गठबन्धनमा आवद्धन नेता, कार्यकर्ताको उपस्थिती रहेको थियो ।

    नेपालगन्जको धम्बोझीस्थित पाहुनाघर पछाडी रेडियो सदभाव नजिक स्थापना भएको क्षेत्रीय स्तरको मिडिया सेन्टरको कार्यक्षेत्र बाँके, बर्दिया, दाङ, सल्यान र पुर्वी रुकुम रहेको केन्द्रिय प्रचार–प्रसार समितिका सदस्य शाहले जानकारी दिनुभयो । क्षेत्रीय मिडिया सेन्टरको संयोजकको जिम्मेवारी पत्रकार शुक्रऋषि चौलागाईलाई दिइएको छ, भने सम्बन्धित जिल्लाका प्रेस युनियनका सभापति पदेन सदस्य रहनु भएको छ । मिडिया सेन्टरबाट नेपाली काँग्रेस तथा लोकतान्त्रिक गठबन्धनका चुनाव सम्बन्धी गतिविधीका समाचार सम्प्रेशन गर्नेछ । नेपाली काँग्रेसले ७ वटा प्रदेशका ९ स्थानमा सोमबार एकैसाथ मिडिया सेन्टर सञ्चालनमा ल्याएको छ ।

     

  • २७ कार्तिक २०७४, सोमबार १२:३१ प्रकाशित
  • Nabintech
    सम्बन्धित