मधु मिडिया प्रा.ली.द्धारा संचालित

सुचना विभाग द. नं. : ६७८-०७४/७५

ठेगाना : कोहलपुर-१0, बाँके

फोन नम्बर : ९८५८०२२६५६ / ९८५६०३९६०२

ईमेल : [email protected]

नेपालका कम्युनिस्ट चरित्र, आचरणको पार्टी छैन । यहाँ आफूलाई कम्युनिस्ट भन्नेहरू सबै कमाउनिस्ट हुन् संघीय समाजवादी फोरम नेपालका अध्यक्ष उपेन्द्र यादव
  • मार्गरेखा संवाददाता

  • स्थानीय निर्वाचनका बेला आ–आफ्नै पार्टीबाट चुनाव लडेका मधेसका दुई ठूला शक्ति राष्ट्रिय जनता पार्टी नेपाल र संघीय समाजवादी फोरम अहिले तालमेल गरेर चुनावमा होमिएका छन् । 

    उनीहरूको मुख्य उद्देश्य भनेको दुई नम्बर प्रदेशमा मधेसवादी दलको सरकार बनाउने हो । त्यसो त यी दुई दलबीचको तालमेललाई पार्टी एकताकै निष्कर्षमा पुर्याउने बहस पनि भइरहेको छ ।

    संघीय समाजवादी फोरम नेपालका अध्यक्ष उपेन्द्र यादव सप्तरी–२ बाट प्रतिनिधिसभातर्फ उमेदवार बनेका छन् । र, उनलाई टक्कर दिँदैछन्, पूर्व सिँचाइमन्त्री उमेश यादवले । उनी वाम गठबन्धनका उमेदवार हुन् । 

    चुनावी प्रचारप्रसार, घरदैलो, कार्यकर्ता भेटघाटमा व्यस्त रहेका उपेन्द्र यादवसँग स्थलगत रिपोर्टिङका लागि सप्तरीको राजविराज पुगेका बाह्रखरीकर्मी अक्षर काका शिवनारायण गिरीले गरेको कुराकानी–

    मधेस लामो समय आन्दोलनले आक्रान्त बन्यो, अहिले निर्वाचनतर्फ उन्मुख भएको, कस्तो छ चुनावको माहौल ?

    उत्साहवद्र्धक छ । आफ्ना हकअधिकारका निमित्त बलिदानीपूर्ण संघर्ष गर्न तत्पर भएका मधेसका जनता निर्वाचनमार्फत आफ्ना हकअधिकार सुरक्षित गर्न तम्तयार छन् ।

    मतदाताहरूको अपेक्षाचाहिँ के छ ?

    यो क्षेत्र आर्थिक रूपले अत्यन्त पिछडिएको क्षेत्र हो । आफ्ना हक र अधिकारप्रति बढी सचेत छन् । राज्यले अन्य क्षेत्रलाई दिए सरहको बराबर अधिकार चाहियो, सँगै विकास हुनुपर्यो भन्ने जनताको विशेष चाहना रहेको छ ।

    राष्ट्रिय जनता पार्टीका अध्यक्ष मण्डलका सदस्य राजेन्द्र महतोले निर्वाचनलाई ‘आन्दोलनकै निरन्तरता’ भन्नुभएको छ,  संघीय समाजवादी फोरम नेपालको धारणाचाहिँ के छ यसमा ?

    चुनाव एउटा संघर्ष हो । चुनावी संघर्षको प्रक्रियामा छौँ । सबै आन्दोलनको अन्तिम परिणाम निर्वाचनले त देखाउने हो ।

    राजपा र संघीय समाजवादी फोरमबीच स्थानीय तहमा तालमेल हुन सकेन, अहिलेचाहिँ तालमेल गरेर अघि बढ्नु भएको छ, फेरि पार्टी एकताको कुरा पनि आइरहेको छ, सम्भव होला ?

    हिजोका कुरा छाडौँ, अहिले चुनावमा सिटका तालमेल हामीले गरेका छौँ । यसमा कति सफल हुन्छौँ, कस्तो परिणाम आउँछ, हेर्न बाँकी नै छ । यो सफल भयो भने मात्रै, परिस्थितिले राम्रो रिजल्ट दियो भने मात्रै पार्टी एकताको विषयमा सोच्न सकिन्छ । राम्रो रिजल्ट दिएन भने अघि नबढ्न पनि सक्छ ।

    फेरि पार्टी एकता हठात् हुने कुरा होइन, त्यसका लागि सिद्धान्त मिल्नुपर्यो । विचार मिल्नुपर्यो । सिद्धान्त–विचारका विषयमा घनिभूत र सघन छलफल हुन जरुरी छ । त्यो अवस्थामा हामी पुगेका छैनौँ । तर, भविष्यमा हुनै सक्दैन भन्ने कुरा होइन ।

    दुई नम्बर प्रदेशमा कांग्रेस, राजपा र संघीय समाजवादी शक्ति मिलेर अघि बढ्नुपर्छ भन्ने धारणा छ, तर त्यो अवस्था त निर्माण भएन, फेरि तपाईंको मुद्दा त वामसँग बढी मिल्छ नि हैन ?

    मुद्दाका हिसाबले माओवादीको भाषासँग हाम्रो भाषाशैली मिल्छ, धेरैजसो । संघीयता, समावेशिता, धर्म निरपेक्षता माओवादीसँग बढी मिल्छ । तर, लोकतान्त्रिक अभ्यासका कुरामा कांग्रेससँग बढी मिल्छ । हामी समाजवादी लोकतान्त्रिक पार्टी हौँ । सोसियल पार्टी हुनुका नाताले सामाजिक न्यायका कुरा एउटासँग मिल्ने र प्रजातन्त्र एउटासँग मिल्ने । र, त्यो पार्टी हामीमात्रै भएकाले त्यस्तो देखिएको हो ।

    कांग्रेससँग दुई नम्बर प्रदेशमा चुनावी तालमेल हुन नसक्नुको कारण के हो ?

    सप्तरी–२, जहाँ म उमेदवार छु, त्यहाँ कांग्रेसले सघाउने कुरा गरेको छ, तथापि उहाँहरूको उमेदवार पनि हुनुहुन्छ । हामीले पनि सुनसरी  छाडेका छौँ, जितेकै सिट छाडेका हौँ । केही ठाउँमा समझदारी भएको छ ।

    तर कतिपय ठाउँमा तपाईंका उमेदवारले छाड्न मानेनन् नि ?

    जहाँ तालमेल भएको छैन, समझदारी भएको छैन, त्यहाँ त उमेदवार हुने नै भयो नि ! समझदारी भएको ठाउँमा तालमेल हुन्छ, अन्यत्र प्रतिस्पर्धा हुन्छ ।

    तपार्ईं विगतमा सुरसरी र मोरङबाट चुनाव लड्नुहुन्थ्यो, यसपटक कोसीवारि चुनाव लड्न आउनुभयो नि ?

    प्रतिनिधिसभा र प्रदेशसभामा यस्तोे कुनै प्रावधान छ र एउटा जिल्लाको मानिस अर्को जिल्लामा गएर उमेदवार बन्नुहुँदैन भन्ने ? छैन । संसदको निर्वाचन देशको जुनसुकै कुनाबाट जो कोही लड्न पाउँछ ।

    हिजो तपाईं भन्दै हुनुहुन्थ्यो– मधेसलाई आठ जिल्लामा मात्रै सीमित राखियो, फेरि तपाईं पनि त्यही आठ जिल्लाभित्रकै एउटा क्षेत्रमा चुनाव लड्न आउनुभएछ, किन ?

    यसमा शंका गर्नुपर्ने कुनै कुरा छैन, दुई नम्बर प्रदेशलाई नै कार्यक्षेत्र बनाउने गरी नै आएको हुँ । यद्यपि १ नम्बरमा सुविधासम्पन्न, विकसित, तुलनात्मक रूपमा आधुनिक भइसकेको ठाउँ भएता पनि त्यसलाई छाडेर पछाडि नै भएको भए पनि पछि परेका जिल्लाहरूमै काम गर्ने र दुई नम्बर प्रदेशलाई बनाउने नै भनेर आएको हुँ ।

    दुई नम्बर प्रदेश अरू प्रदेशको तुलनामा पछाडि पर्नुको कारण के हो ? चुनावैपिच्छे प्रतिनिधि जिताएर नपठाएको पनि होइन ?

    मुख्य कारण भनेको राज्यको उपेक्षा र उदासीनता नै हो । उद्योगधन्दा कलकारखाना नहुनु नै हो । यहाँका अधिकांश किसानहरू परम्परागत कृषिमा मात्रै आफ्नो जीविका चलाउन बाध्य छन् । शिक्षा, स्वास्थ्यको क्षेत्रमा सरकारले ध्यान नै दिएन ।
    विकास निर्माणमा राज्यले लगानी गर्दै गरेन । लगानी नगर्ने विभेदपूर्ण नीति राज्यले लिएकैले दुई नम्बर प्रदेश पछाडि परेको हो ।

    सप्तरीमा विगतको निर्वाचनमा वामको अवस्था राम्रै थियो । अहिलेको अवस्थाचाहिँ कस्तो छ  ? 

    तराईको मानसिकता कम्युनिस्टलाई मन पराउने मानसिकता होइन । तराईका जनता लोकतन्त्रमा विश्वास राख्छन् ।  लोकतन्त्र नै उनीहरूले मन पराउने व्यवस्था हो । र, उनीहरू कुनै पनि अधिनायकवादलाई मन पराउँदैनन् । अव नेपालमा कम्युनिस्ट कहाँ छन् ?

    आफूलाई कम्युनिस्ट भन्दै तपाईंकै आँखा अघिल्तिर मत मागिरेका छन् त, तराई– मधेसका शोषित उत्पीडित अधिकार स्थापित गर्छौं पनि भन्दैछन् !

    अहिले नेपालका नामी माफियाहरू कुन पार्टीमा छन्, मलाई भन्नूहोस् त ! तस्करहरू, भ्रष्टहरू सबैले कम्युनिस्टका खोल ओढेका छन् । नेपालका कम्युनिस्ट चरित्र, आचरणको पार्टी  छैन । यहाँ आफूलाई कम्युनिस्ट भन्नेहरू सबै कमाउनिस्ट हुन् । अतः कम्युनिस्ट आयो, आउँदैछ भन्नु, डर पाल्नु बेकारको कुरा हो ।

    तपाईं भन्दै हुनुहुन्छ– तराईंमा अशिक्षा छ, अस्वास्थ्य छ, अविकास छ । सपना बाँड्न उनीहरू नै अगाडि छन् । त्यसैले तराई–मधेसको मत वामतिर आकर्षित हुँदैन त ?

    गरिब, निमुखाको मत कम्युनिस्टले पाउने भए अफ्रिकामा किन कम्युनिस्ट पार्टी झ्यांगिएन ? फस्टाएन ? किन अफ्रिकी जनता कम्युनिस्टलाई घृणा गर्छन् ? सबैभन्दा गरिबी, बेरोजगारी त त्यहाँ छ । तर, त्यहाँ कम्युनिस्ट छैनन् । त्यसैले त्यो सोच र चिन्तन गलत हो । अहिले त जहाँ ठूला माफिया छन्, त्यहाँ कम्युनिस्ट छन् । जहाँ ठूला तस्कर छन्, त्यहाँ कम्युनिस्ट छन् ।

    सप्तरी–२ को विकासका लागि तपाईंको योजना के छ ?

    सप्तरी–२ लाई मधेस प्रदेश बनाउने हो । जनतालाई अधिकारसम्पन्न बनाउने हो । र, लगानी भित्र्याउन प्रयास गर्ने हो ।  मलाई लाग्छ– यहाँको गरिबी र पछौटेपनबाट मुक्ति पाउन आर्थिक विकास पहिलो शर्त हो । आवश्यकता हो । त्यसका लागि प्रयास गर्ने छु ।

    प्रदेश नम्बर–२ मा कसको सरकार बन्छ, गैरमधेसवादी दलको, या मधेसवादी दलको ?

    निश्चितरूपमा मधेसवादी दलको सरकार बन्छ ।

    पछिल्ला निर्वाचनलाई हेर्ने हो भने त्यो सम्भावना कम देखिन्छ नि ?

    ०१५ सालमा नेपाली कांग्रेसले दुई तिहाई भन्दा बढी ल्याएको थियो । अहिले बहुमत ल्याउन पनि सक्ने अवस्था पनि छैन, किन ? राजनीतिक दलको प्रभावकारिता र उतार–चढाव भई नै रहन्छ । यो लोकतन्त्रमा कुनै अनौठो कुरा होइन ।

    मधेसका मतदातालाई यहाँहरूले गर्ने आग्रह के हो ?

    यहाँका मतदाता परिवर्तन, विकास र अधिकारका लागि संघर्षशील हुनुपर्छ । अन्यकुराबाट प्रभावित भएर मत हाल्नुहुने छैन भन्नेमा हामी विश्वस्त छौँ ।१२ खरीबाट

  • ४ मंसिर २०७४, सोमबार १२:२१ प्रकाशित
  • Nabintech
    सम्बन्धित