उच्च अदालत बार एशोसियन नेपालगञ्ज इजलाशको नयाँ नेतृत्वका लागि आज मंगलबार उम्मेदवारी दर्ता हुदैछ । नयाँ नेतृत्वका लागि यहि १६ गते मतदान तोकिएको बारका अध्यक्ष बलबहादुर चन्दले जानकारी दिए । बारको अध्यक्षका लागि प्रजातन्त्रवादी कानुन व्यवसायीहरुले शिवकुमार श्रेष्ठ अध्यक्ष र चित्रबहादुर शाही सचिव रहेको प्यानल तयार पारेका छन् ।
यसैगरी प्रगतिशिल तथा पेशाकर्मी समूहले विकास आचार्यको नेतृत्वमा प्यानल तयार गरेको छ । श्रेष्ठ बारका पुर्ब अध्यक्ष हुन् भने आचार्य पुर्व सचिव हुन् । आचार्य यसअघि पनि अध्यक्षका प्रत्यासी थिए । सो प्यानलमा सचिवमा सुनिता शर्मा ज्ञवाली र कोषाध्यक्षमा रामचन्द्र घिमिरे उम्मेदवार रहेका छन् । उपाध्यक्षमा राधेश्याम थारु र राजाराम गुप्ता दुईजनाको दावेदारी रहेको छ । अध्यक्ष ,उपाध्यक्ष, सचिव र कोषाध्यक्ष तथा ९ जना सदस्य गरी १३ सदस्यीय कार्यसमितिका लागि २८६ जना सदस्य मतदाताका रुपमा रहेका छन् ।
बारका अध्यक्ष चन्दका अनुसार आज विहान ११ बजेदेखि ४ बजेसम्म उम्मेदवारी दर्ताको समय तोकिएको छ । ६ गते दावी विरोधको समय तोकिएको छ भने ७ गते उम्मेदवारी मनोनयन फिर्ताको समय राखिएको छ । भदौं १६ गते विहान ९ बजेदेखि दिउसो ४ बजेसम्म मतदान हुनेछ । मतदान समापन लगत्तै गणना सुरु हुने बार अध्यक्ष चन्दले बताए । अध्यक्षका उम्मेदवार आचार्यले आफुहरुमधेसी, महिला, जनजातीको समूह बनाएर प्रतिष्पर्धामा उत्रिएका कारण यसपटक विजयी सुनिश्चित भएको बताए । बारको नेतृत्व लामो समयदेखि प्रजातान्त्रिक समूहले जित्दै आएको छ ।
बारको निर्वाचनका लागि लक्ष्मणप्रसाद पराजुलीको संयोजकत्वमा लक्षीराम सापकोटा र विनोद गुप्ता रहेको ३ सदस्यीय निर्वाचन समिति गठन गरिएको बारका अध्यक्ष चन्दले लोकप्रिय सन्देशलाई जानकारी दिए ।
