काठमाडौं । भदौ २३ र २४ गतेको घटनासम्बन्धी जााचबुझ आयोगले नेपाल प्रहरीका निवर्तमान महानिरीक्षक चन्द्रकुबेर खापुङलाई विदेश जान रोक लगाएको छ ।आयोगको आज बसेको बैठकले निवर्तमान प्रहरी महानिरीक्षक खापुङलाई विदेश जान रोक लगाउने निर्णय गरेको हो ।
आयोगले आफ्नो अनुमतिविना खापुङ काठमाडौं उपत्यका छाडेर बाहिर जान पनि नपाउने निर्णय गरेको छ । खापुङ आजैदेखि प्रहरी महानिरीक्षकबाट सेवा निवृत्त हुनुभएको थियो ।
आयोगले भदौ २३ र २४ गतेका घटनाको छानबिन तथा जाँचबुझका लागि कुनै पनि समयमा आयोगमा उपस्थित हुनुपर्ने भएकाले आजैदेखि लागू हुने गरी विदेश भ्रमणमा रोक लगाउने र आयोगको स्वीकृति बेगर काठमाडौं उपत्यका छाड्न नपाउने व्यवस्था गर्न सम्बन्धित निकायलाई पत्राचार गरेको हो ।
यसबारे खापुङलाई जानकारीसमेत दिइसकेको आयोगले जनाएको छ ।
