नेपालगन्ज  जेठ २५ । खजुरा गाउँपालिका–२ गौघाटस्थित राष्ट्रिय पशु प्रजनन कार्यालयले करिब १७ हजार केजी विभिन्न घाँसको बीउ उत्पादन गरेको छ । आर्थिक वर्ष २०८१/८२ मा विभिन्न जातको १६ हजार ८४५ केजी घाँसको बीउ उत्पादन भएको राष्ट्रिय पशु प्रजनन कार्यालय गौघाटका प्रमुख वरिष्ठ पशुविकास अधिकृत डा खिमानन्द खनालले जानकारी दिनुभयो । उहाँका अनुसार सबैभन्दा धेरै जै घाँसको आठ हजार ७५५, टियोसेन्टी घाँसको सात हजार ११०, भेच घाँसको पाँच सय, वर्षिम घाँसको चार सय ५० र ज्वाइन्ट भेच घाँसको ३० गरी १६ हजार ८४५ केजी घाँसको बीउ उत्पादन भएको छ । “उत्पादन गरेको बीउ किसानलाई पनि बिक्री वितरण गर्ने गरेका छाँै, त्यसबाहेक हामी आफँै घाँसखेतीको गर्ने गरेका छाँै”, कार्यालय प्रमुख खनालले भन्नुभयो, “अहिले किसानले पनि घाँसखेती गर्न बीउ खोज्दै आउन थाल्नुभएको छ ।” यस वर्ष जै घाँस प्रतिकेजी रु ८०, वर्षिम दुई सय ७५, भेच एक सय २०, ज्वाइन्ट भेच ८० र टियोसेन्टी एक सय २० प्रतिकेजी बिक्री मूल्य निर्धारण भएको थियो । चालु आवको वैशाखसम्म १० हजार ७७३ केजी घाँसको बीउ बिक्री भएको राष्ट्रिय पशु प्रजनन कार्यालयका पशुसेवा प्राविधिक देवनारायण जैशीले बताउनुभयो ।