अर्घाखाँची फागुन २  । लुम्बिनी प्रदेशका मुख्यमन्त्री चेतनारायण आचार्य ले शैक्षिक गुणस्तर अभिवृद्धिका लागि शिक्षक, विद्यार्थी र अभिभावकबीच परस्पर सहकार्य आवश्यक रहेको बताउनुभएको छ ।
छत्रदेव गाउँपालिका–१ मा रहेको आदर्श आधारभूत विद्यालयको हीरक महोत्सव–२०८२ को शुक्रबार उद्घाटन गर्दै मुख्यमन्त्री आचार्यले सानै उमेरदेखि बालबालिकालाई अनुशासित बनाउन नैतिक शिक्षालाई अनिवार्य गर्नुपर्नेमा जोड दिनुभएको हो ।‘तपाईंहरूले कस्तो खालको शिक्षा दिइरहनु भएको छ, ती विद्यार्थीको नतिजा कस्तो आइरहेको छ भन्ने विषयमा ध्यान दिन जरुरी छ । बोर्डिङको फेसन बढ्दै गएको छ । तर, तपाईंहरूले मेहनत गर्नुभयो भने बोर्डिङभन्दा राम्रो शिक्षा दिन सक्नुहुन्छ । यो विद्यालयलाई नमुनायोग्य बनाउन सकिन्छ,’ उहाँले भन्नुभयो–‘अभिभावकहरूलाई निवेदन गर्न चाहन्छु, आफ्ना छोराछोरीको अवस्थाबारे जानकारी राख्नुपर्छ । सानो उमेरदेखि नै अनुशासित बनाउन सक्नुपर्छ । मुलुकमा अराजकता बढ्दै गइरहेको छ । सानैदेखि बालबालिकालाई नैतिकवान र अनुशासित बनाउन आवश्यक छ । बच्चालाई सानैदेखि मर्यादित र अनुशासित बनायौं भने, घर र समाज बुझायौं भने त्यो बच्चाको भविष्य उज्ज्वल हुन्छ ।’
मुख्यमन्त्री आचार्यले गाउँमा विकास पुगेकाले अब गाउँ फर्कन पनि आह्वान गर्नुभयो । विकास निर्माणको दृष्टिकोणले अर्घाखाँचीलाई अन्य पहाडी जिल्लाको तुलनामा उदाहरण दिन लायक जिल्लाका रूपमा विकास गर्दै लगिएको उल्लेख गर्दै उहाँले गाउँगाउँमा कच्ची बाटाहरू पक्की बन्दै गएको, खानेपानीका धारा पुगेको र विद्यालय तथा स्वास्थ्य चौकी स्थापना भएको बताउनुभयो ।
‘हिजो तपाईंहरूले नै गाउँमा विकास ल्याउनुपर्छ, बाटो बनाउनुपर्छ, विद्यालय खोल्नुपर्छ, स्वास्थ्य चौकी खोल्नुपर्छ भन्नुभएको थियो । अहिले ती कुराहरू पूरा हुँदै गइरहेका छन् । तर, विडम्बना गाउँ खाली हुँदै गएका छन् । घरका ढोकामा ताल्चा झुण्डिएका छन् । छानाहरू चुहिन थालेका छन् र भत्किन थालेका छन्,’ उहाँले भन्नुभयो–‘यो माटोलाई नबिर्सिनुहोस् । हिजो हाम्रा हजुरबुवा र बुवाहरूले यो ठाउँ बदल्न जुन योगदान गर्नुभयो, त्यो योगदान गाउँले बुझेको छ । समाजले भुलेको छैन । यो ठाउँलाई समृद्ध बनाउन तपाईंहरूको योगदान आवश्यक छ ।’