सेवा केन्द्रले आन्तरिक राजस्व कार्यालय नेपालगन्जअन्तर्गत पहिलो व्यावसायिक स्थायी लेखा नम्बर (प्यान) प्रमाणपत्र जारी गरेको छ । गाउँपालिकाका प्रमुख प्रशासकीय अधिकृत नवराज वली र करदाता सेवा केन्द्रका शाखा प्रमुख मुकद्दर अली मुकेरीले संयुक्त रूपमा नरैनापुर गाउँपालिका–२, बैउहवाकी जन्नतुल पठानिनलाई पहिलो प्यान प्रमाणपत्र हस्तान्तरण गर्नुभयो । पठानिनले सञ्चालन गर्ने मदिना परफ्युम एन्ड जनरल स्टोरका लागि स्थायी लेखा नम्बर जारी गरिएको हो । उक्त व्यवसायले अत्तर तथा अन्य सुगन्धित सामग्री, सौन्दर्य प्रसाधन, साबुन र किरानाका सामानको थोक तथा खुद्रा बिक्री गर्नेछ । प्रमुख प्रशासकीय अधिकृत वलीले गाउँपालिकाभित्रै करदाता सेवा उपलब्ध हुँदा स्थानीय व्यवसायीलाई औपचारिक रूपमा व्यवसाय सञ्चालन गर्न र करको दायरामा आउन सहज हुने बताउनुभयो । “स्थानीयस्तरमै करसम्बन्धी सेवा उपलब्ध हुँदा आर्थिक तथा प्रशासनिक काम सहज, छिटो र छरितो रूपमा गर्न सकिन्छ । यसले व्यवसायीलाई कानुनी प्रक्रियाअनुसार व्यवसाय सञ्चालन गर्न र करको दायरामा आउन थप प्रोत्साहन मिल्ने विश्वास लिएका छौँ”, उहाँले भन्नुभयो । करदाता सेवा केन्द्रका शाखा प्रमुख मुकद्दर अली मुकेरीले नरैनापुरका करदातालाई आफ्नै गाउँपालिकाबाट करसम्बन्धी सेवा उपलब्ध गराउने गरी केन्द्र सञ्चालनमा ल्याइएको बताउनुभयो । गाउँपालिकामै करदाता सेवा केन्द्र सञ्चालनमा आएपछि करसम्बन्धी कामका लागि नेपालगन्ज पुग्नुपर्ने समय र खर्च घट्ने अपेक्षा गरिएको छ । रासस