कोहलपुर बैशाख २२ । नेपाली काँग्रेसका वरिष्ठ नेता डा.शेखर कोइरालाले देश अत्यन्तै संकटको अवस्थामा रहेको बताउदै नेपाली काँग्रेसका नेता कार्यक्रता एक जुट हुनु पर्ने बताए ।

साे कुरा शनिबार बाँकेकाे काेहलपुरमा   नेपाली काँग्रेस बाँके क्षेत्र नं.१ र प्रदेश सभा ‘क’ र ‘ख’ को   आयोजित दोस्रो सम्मेलनलाई सम्वोधन गर्दै बताएका हुन ।

नेता काेईरालाले  सरकार फेरिएसँगै नीति पनि फेरिने अवस्थाले   मुलुकमा सुशासन र सम्बृद्धि कायम  राजनीतिक स्थायित्व नहुँदा मुलुक आर्थिक अवस्थाबाट समेत कमजोर बन्दै गएकाे बताउदै  मुलुकको यो अवस्था फेर्नका लागि दुई ठूला शक्ति काँग्रेस र एमाले मिल्नुको विकल्प नभएको बताए ।

नेता काेईरालाले अहिलेको अवस्था चिर्न निर्वाचन प्रणाली फेर्नु पर्नेमा उनको जोड थियो । ‘अहिलेको मिश्रित निर्वाचन प्रणालीका कारण कसैको पनि वहुमत पुग्ने अवस्था रहदैन जवसम्म वहुमत पुग्दैन सरकार बनाउन असम्भव छ उनले भने–‘काँग्रेस र एमाले मिल्ने हो भने करिव दुई तिहाइ पुग्छ र निर्वाचन प्रणाली फेर्न सकिन्छ । त्यसका लागि पनि दुई शक्ति एक हुन जरुरी छ ।’ उनले सरकारी ठगी प्रकरणमा उपप्रधान तथा गृहमन्त्री रवि लामिछाने मुछिएको विषयलाई पनि कार्यक्रममा उठाएका थिए । उनले गृहमन्त्री लामिछानेको काँग्रेसले राजिनामा नमागेको बताए । जनताहरुले नै सहकारी ठगीमा गृहमन्त्री संलग्न रहेको बताइरहेकाले काँग्रेस त्यही कुरा संसदमा उठाएको बताए । उनले गृहमन्त्रीको राजिनामा नमागेर काँग्रेसले उनमाथि छानविन गर्न संसदीय छानविन समिति बनाउन माग गर्दै आएको बताए । उनले संसदमा यो विषय प्रवेश पाइसकेकाले संसदीय छानविन समिति नबनेसम्म काँग्रेसले आफ्नो अडानबाट पछि नहट्ने पनि प्रष्ट्याए । उनले पार्टीभित्रको आन्तरिक विषयमा पनि आफ्नो धारणा राखेका छन् । उनले अवका चुनावमा गठबन्धन नहुने भएकाले एक ढिक्का हुन काँग्रेस कार्यकर्ताहरुलाई निर्देशन दिए । उनले एक ढिक्का भएर पार्टीलाई बलियो बनाउनतर्फ लाग्न निर्देशन दिए । उपनिर्वाचनको चुनावमा भएको पराजयले काँग्रेसलाई थप बलिएको बनाएको स्मरण गर्दै वरिष्ठ नेता डा. कोइरालाले आगामी चुनावमा सबै कार्यकर्ताहरु एक हुनु पर्ने बताए । उनले पार्टीको आन्तरिक प्रतिस्पर्धामा गुटउपगुट हुनु स्वभाविक भएपनि आमनिर्वाचनमा टिकट जस्ले पाएपनि उसलाई जिताउनु सम्पूर्ण कार्यकर्ताको दायित्व भएको बताए । कार्यक्रमका प्रमुख अथिति समेत रहेका डा. कोइरालाले पार्टीलाई गतिशील र चलायमान बनाउन सम्पूर्ण नेता तथा कार्यकर्ताहरुलाई निर्देशन समेत दिए ।

नेपाली  काँग्रेस सहमहामन्त्री किशोरसिंह राठोरले मुलुकको वृहत्तरहितका लागि काँग्रेस बाहेक अरु पार्टीको कल्पना गर्न नसकिने बताए । मुलुकका हरेक परिवर्तनमा नेपाली काँग्रेसले नेतृत्वदायी भूमिका निर्वाह गरेको राठोरले स्मरण गरे । उनले पार्टीलाई एक ढिक्का बनाएर लैजानुको विकल्प नभएको समेत बताए । उनले पार्टीमा त्यागको संस्कार सिक्न पनि कार्यकर्ताहरुलाई सुझाव दिए । यस्तै नेपाली काँग्रेसका केन्द्रीय सदस्य दीपक गिरीले काँग्रेसलाई बलियो बनाउन संगठनका गतिविधिहरुलाई चलायमान बनाउनुपर्ने बताए । उनले भातृ संस्थाहरुको परिचालन हुन नसकेकोमा दुख व्यक्त गरेका छन् । पार्टीमा अनुशासन आवश्यक रहेकोमा पनि उनले जोड दिए । काँग्रेस लुम्विनी प्रदेश सभापति अमरसिंह पुनले पार्टीमा खराव व्यक्तिहरुलाई पुरष्कृत गर्ने प्रवृत्ति हावी भइरहेको भन्दै त्यसलाई नीतिगत रुपमै निरुत्साहित गरिनुपर्नेमा जोड दिए । कार्यक्रममा काँग्रेस बाँकेका सभापति नारायण प्रसाद गौडेलले मुलुकको विकासका लागि काँग्रेसको नेतृत्व बाहेक अरु पार्टी असफल भएको बताए । काँग्रेस क्षेत्रीय सभापति पोषण केसीको अध्यक्षतामा भएको दोस्रो सम्मेलनमा काँग्रेस केन्द्रीय सदस्यहरु सञ्जय गौतम, गोपाल दहित, मधु आचार्यलगायतले पनि आआफ्नो धारणा राखेका थिए । आर्थिक र सांगठनिक प्रतिवेदन समेत पास गरिएको उक्त सम्मेलनमा विभिन्न व्यक्तिहरुलाई सम्मानित समेत गरिएको छ