भदाै २५ विराटनगर । प्रधानमन्त्री पुष्पकमल दाहाल ‘प्रचण्ड’ ले वर्तमान सत्ता साझेदार दलबीचको गठबन्धन पाँच वर्ष टिक्ने बताउनुभएको छ ।
आज विराटनगर आइपुग्नुभएका प्रधानमन्त्री दाहालले विराटनगर विमानस्थलमा पत्रकारहरूलाई सङ्क्षिप्त प्रतिक्रिया दिँदै सो टिप्पणी गर्नुभएको हो ।
प्रधानमन्त्री दाहालसहित समाजवादी मोर्चाको सन्देश सभालाई सम्बोधन गर्न सो मोर्चामा सहभागी नेताहरू पनि यहाँ आइपुग्नुभएको छ ।
सत्तारुढ दल नेकपा माओवादी केन्द्र, नेकपा एकीकृत समाजवादी, जनता समाजवादी पार्टी र नेकपा विप्लव समूह आबद्ध समाजवादी मोर्चाद्वारा आज विराटनगरमा सो सभाको आयोजना गरिएको छ ।
सो सभालाई नेकपा एसका अध्यक्ष माधवकुमार नेपाल, जसपा अध्यक्ष उपेन्द्र यादव र नेकपाका महासचिव नेत्रविक्रम चन्द ‘विप्लव’ ले सम्बोधन गर्नुहुने कार्यक्रम छ ।
